jaan-e-sukuun aa bhii jaa teraa hii intazaar hai

jaan-e-sukuun aa bhii jaa teraa hii intazaar hai
aa.Nkho.n se ashk hai ravaa.N jaa.N bhii beqaraar hai

hone ko fasl-e-gul bhii hai daavat-e-aish hai magar
apanii bahaar kaa mujhe aaj bhii intazaar hai

saare sahaare ishq ke TuuT chuke hai.n hijr me.n
ek tumhaarii yaad bas dard kii Gam-gusaar hai

ahad-e-vafaa kaa aap ke lutf-o-karam kaa aap ke
aur kisii ko ho na ho mujh ko aitabaar hai

luT ga_ii Gam kii aabaruu luT chukii dil kii aarazuu
'Yahya' nigaah-e-lutf kaa phir bhii ummiid_vaar hai